ශ්‍රී ලංකාවේ මධ්‍යම කඳුකරයේ, නුවරඑළිය දිස්ත්‍රික්කයේ පිහිටා ඇති ඉතා සුන්දර දියඇල්ලක් ලෙස ගාට්මෝර් ඇල්ල (Gartmore Falls) හැඳින්විය හැකියි. මෙය පූජනීය ශ්‍රී පාද කන්දට ඉතා ආසන්නයෙන් පිහිටා ඇති නිසා බොහෝ දෙනෙක් මෙය "ශ්‍රී පාද ඇල්ල" ලෙස ද හඳුන්වනු ලබනවා.

දියඇල්ලේ සුවිශේෂී ලක්ෂණ

මීටර් 25ක පමණ උසකින් යුත් මෙම සුන්දර දියඇල්ල නිර්මාණය වන්නේ ගාට්මෝර් වතුයාය හරහා ගලා එන දිය පහරවල් දෙකක් එක් වීමෙනි. ප්‍රධාන ඇල්ල නිර්මාණය වීමට පෙර මෙම දිය පහරවල් දෙක වෙන වෙනම කුඩා දියඇලි දෙකක් නිර්මාණය කරන අතර, ඉන්පසුව එකට එක්වී සෘජුවම මාස්කෙළිය ජලාශයට කඩා හැලෙනවා.

ශ්‍රී පාද අඩවියේ තේ වතු යායකින් සහ සදාහරිත කඳු පන්තියකින් වටවී ඇති නිසා මෙහි දැකුම්කළු බව තවත් වැඩි වෙනවා.

මරේ ඇල්ල (Moray Falls) සමඟ ඇතිවන ව්‍යාකූලත්වය

ගාට්මෝර් ඇල්ලට මීටර් කිහිපයක් දුරින් ආසන්න වශයෙන් සමාන උසකින් යුත් "මරේ ඇල්ල" (Moray Falls) නමින් තවත් දියඇල්ලක් තිබෙනවා. එයද මාස්කෙළිය ජලාශයටම කඩා හැලෙන අතර මේ දියඇලි දෙකම එකිනෙකට ආසන්නයේ පිහිටා ඇති නිසා බොහෝ දෙනෙක් මෙම දියඇලි දෙකේ නම් පටලවා ගන්නා අවස්ථා ද දැකගත හැකියි.

ගමන් මාර්ගය

ඔබ මෙම දියඇල්ල නැරඹීමට අදහස් කරනවා නම්;

•
කොළඹ සිට: අවිස්සාවේල්ල - ගිනිගත්හේන - හැටන් - මාස්කෙළිය හරහා කිලෝමීටර් 155ක පමණ දුරක් ගෙවා මෙහි ළඟා විය හැකියි (පැය 4ක පමණ ගමනක්).
•
නුවරඑළියේ සිට: තලවකැලේ - හැටන් - මාස්කෙළිය හරහා කිලෝමීටර් 72ක පමණ දුරකින් පිහිටා ඇත (පැය 2ක පමණ ගමනක්).

නල්ලතන්නිය නගරයට කිලෝමීටර් 5ක් පමණ දුරින් මෙය පිහිටා ඇත. නල්ලතන්නියට මදක් පෙර හමුවන මුල්ගම ප්‍රදේශයෙන් මරේ වතුයාය පාරට (Maray Estate Road) හැරී ගමන් කිරීමෙන් මෙම ඇල්ල වෙත ළඟා විය හැකි අතර, ප්‍රධාන පාරේ සිට මීටර් 500ක් පමණ ඇතුළට වන්නට මෙය පිහිටා තිබෙනවා.

පූජනීය ශ්‍රී පාද කන්දේ සුන්දර දසුනක් ද සමඟින් සොබාදහමේ අපූර්වත්වය විඳගැනීමට කැමති ඔබට ගාට්මෝර් ඇල්ල කියන්නේ කදිම නැවතුම්පොළක් වේවි.